გიორგი კუჭუაშვილი

დაკავებული

ნაწამები

ძალადობა

პატიმარი

გ. კუჭუაშვილი

გიორგი
კუჭუაშვილი

30 წლის გიორგი კუჭუაშვილი, ორი შვილის მამა, იმ ათასობით ადამიანს შორის იყო, ვინც 2024 წლის მაისში ე.წ. „რუსული კანონის“ წინააღმდეგ ქუჩაში გამოვიდა, ის სწორედ ამ აქციაზე დააკავეს. რუსეთის „უცხოელი აგენტების შესახებ“ კანონზე დაფუძნებული კანონი საფრთხეს უქმნიდა სამოქალაქო საზოგადოებას, მედიის თავისუფლებას და საქართველოს ევროპულ მომავალს.

«მე უსამართლოდ ვზივარ ციხეში. არასდროს ჩამიდენია დანაშაული, ყოველთვის კეთილსინდისიერი მოქალაქე ვიყავი. ეს დაკავებები მხოლოდ იმისთვის ხდება, რომ სხვები დააშინონ»
—გიორგი კუჭუაშვილი

4 თებერვალს, თვეების განმავლობაში გაჭიანურებული სასამართლო პროცესის შემდეგ, მოსამართლე მიხეილ ჯინჯოლიამ კუჭუაშვილს 4 წლით თავისუფლების აღკვეთა მიუსაჯა და არც ერთი შემამსუბუქებელი გარემოება არ გაითვალისწინა. მისი ბრალდება? ნახევრად სავსე პლასტმასის ბოთლის სპეცრაზმელისკენ სროლა. გიორგის ადვოკატის, ლაშა ცუცქირიძის თქმით, ვიდეომტკიცებულებამ ვერ დაადასტურა მისი ვინაობა, ხოლო დაზარალებულმა სპეცრაზმელმაც ვერ ამოიცნო ბრალდებული. ერთადერთი მოწმე, რომელიც სასამართლოში თვენახევრის შემდეგ გამოჩნდა, პოლიციელი იყო, რომელმაც ფოტო ამოცნობის ოქმით დაასახელა კუჭუაშვილი.

ცუცქირიძის თქმით, ის არ უარყოფს, რომ ე.წ. რობოკოპების მიმართულებით ნახევრადსავსე პლასტმასის ბოთლი ისროლა, თუმცა ბრალდების კვალიფიკაციას არ ეთანხმება, ანუ პოლიციელზე თავდასხმად არ მიიჩნევს.

«როგორ შეიძლება, იყო გულგრილი იმ მოვლენების მიმართ, რაც დღეს ქვეყანაში ხდება? ჩვენ შეიძლება დაგვიჭირეს იმისთვის, რომ სხვები დაეშინებინათ და აქციაზე აღარ გამოსულიყვნენ. მაგრამ მოვუწოდებ ყველას – არ შეეშინდეთ, იყვნენ მამაცები. ყოველდღე ვგრძნობ გარედან მხარდაჭერას, მადლიერი ვარ და მეც მხნედ ვარ ამითი»
—გიორგი კუჭუაშვილი

«ის ფაქტი, რომ მას თავდასხმას ედავებიან, მძიმე ბრალდებას, რომელიც მიზნის და განზრახვის სხვა ერთობლიობის დადგენას საჭიროებს მტკიცებულებების სახით და ასეთი მტკიცებულება ბრალდების მხრიდან მოპოვებული არ ყოფილა, ვერ შეფასდება თავდასხმად. თუ მოსამართლე მიიჩნევს ასე, ეს უნდა ჩაითვალოს პოლიციელისადმი წინააღმდეგობად. სასჯელები განსხვავებული»
—ადვოკატი ლაშა ცუცქირიძე

ის განმარტავს, რომ საქმეში არსებობს შინაგან საქმეთა სამინისტროს განსაკუთრებულ დავალებათა დეპარტამენტის დაზარალებული თანამშრომელი, ვიდეომტკიცებულება და ერთი პოლიციელის ჩვენება, თუმცა ჰაბიტოსკოპიური ექსპერტიზა არ ადასტურებს, რომ მსროლელი კუჭუაშვილია.

«ჩვენ კვალიფიკაციის ნაწილში არ ვეთანხმებით და როგორც იურისტი, საკითხს ვაყენებ ასე, რომ მოსამართლემ შეაფასოს პოლიციელის ქმედება იყო კი წესრიგის დამყარებისკენ მიმართული?»
—ლაშა ცუცქირიძე

გარდა ამისა, სამედიცინო დასკვნის მიხედვით, დაზარალებულ სპეცრაზმელს მხოლოდ უმნიშვნელო ტრავმა ჰქონდა, რაც მის ჯანმრთელობაზე არ ასახულა. მიუხედავად ამისა, სასამართლომ მკაცრი განაჩენი გამოიტანა.

ცუცქირიძის განცხადებით, სასამართლოს პროცესი განზრახ ჭიანურდებოდა, რათა განაჩენი ახალი პრეზიდენტის უფლებამოსილების დაწყების შემდეგ გამოცხადებულიყო – რაც გამორიცხავდა სალომე ზურაბიშვილის მიერ შეწყალების შესაძლებლობას. გიორგი კუჭუაშვილი ერთადერთი არ არის, ვინც მსგავს ვითარებაში აღმოჩნდა. მისი თანამებრძოლების, გიორგი ოკმელაშვილის, საბა მეფარიშვილის და ომარ ოკრიბელაშვილის შემთხვევებშიც დაცვის მხარე ოქტომბრიდან მოყოლებული საქმის განხილვის მიზანმიმართულ გაჭიანურებაზე საუბრობს.

«ეს კანონი პირადად ჩემ და ჩემ საქმიანობაზე არ ვრცელდებოდა, მაგრამ ვიცოდი, საითკენ მიდიოდა ეს პროცესი და რა მიზნები ჰქონდა. ის არ ემსახურებოდა ქვეყნის ინტერესებს, ამიტომ ვიყავი იმ დემონსტრაციაზე»
—გიორგი კუჭუაშვილი

ახლა საჩივრის დაკმაყოფილების შემთხვევაში სასამართლო სხდომის ჩანიშვნას შესაძლოა თვეები დასჭირდეს, შეწყალება კი ამ ეტაპზე პოლიტიკურად შეუძლებელი ჩანს. დღეს, როდესაც ყველა სამართლებრივი გზა თითქმის ამოწურულია, საერთაშორისო და ადგილობრივი უფლებადამცველები ამტკიცებენ, რომ ეს საქმე პოლიტიკურად მოტივირებული იყო და უფრო ფართო კონტექსტში, დემოკრატიისა და სამოქალაქო თავისუფლებების შეზღუდვის ნაწილად უნდა განვიხილოთ.

※Loading...