«საქართველოში დემოკრატია დასრულდა, ეს საზოგადოებას, მათ შორის მეც, გვაძლევს წინააღმდეგობის გაწევის უფლებას, რათა დემოკრატიული სახელმწიფო შენარჩუნდეს... მინდა დიდი მადლობა გადაგიხადოთ, ბრძოლას ყოველთვის აქვს აზრი.»
Loading...
ზვიად ცეცხლაძე, 19 წლის სამართლის სტუდენტი და აქტივისტი, 2024 წლის დეკემბრის დასაწყისში დააკავეს. მისი მხარდამჭერები ამბობენ, რომ ეს იყო პოლიტიკურად მოტივირებული დაპატიმრება, რომელიც მიზნად ისახავდა ახალგაზრდული პროტესტის ჩახშობას.
სტუდენტური მოძრაობა "დაფიონის" დამფუძნებელი, ცეცხლაძე, რუსული კანონის წინააღმდეგ გამართული დემონსტრაციების ავანგარდში იდგა. მოძრაობამ მოაწყო არაერთი ხმაურიანი აქცია, მათ შორის რუსული საკრუიზო გემის წინააღმდეგ ბათუმში და ყოველკვირეული საპროტესტო გამოსვლები თბილისის სახელმწიფო უნივერსიტეტში. გარდა სამოქალაქო აქტივიზმისა, ცეცხლაძემ უკრაინაში “ქართულ ლეგიონში” სამხედრო წვრთნაც გაიარა, რადგან მისი თქმით, ახალგაზრდებმა უნდა იცოდნენ, როგორ დაიცვან თავიანთი ქვეყანა.
მისი დაკავება კი აქციაზე არ მომხდარა – ის მეგობარს აცილებდა, როდესაც სამოქალაქო ტანსაცმელში ჩაცმული პირები მიუახლოვდნენ და წაიყვანეს. "ის მეგობარ გოგოსთან ერთად იყო, როცა უცნობმა პირებმა ქუჩიდან წაიყვანეს," - განაცხადა მისმა ადვოკატმა.
დაკავების შემდეგ, ცეცხლაძის ბინაში ჩხრეკა რამდენიმე საათის განმავლობაში გაგრძელდა. ამ პროცესზე ადვოკატი არ დაუშვეს, რაც საქართველოს კანონმდებლობის უხეში დარღვევაა. ეს განსაკუთრებით მნიშვნელოვანია, რამდენადაც ცეცხლაძის განცხადებით, ჩხრეკის ოქმში მითითებული ნივთები მას არ ეკუთვნის. ადვოკატს მისვლის ნება მხოლოდ მას შემდეგ მისცეს, რაც დაკავების ოფიციალური გადაწყვეტილება გამოცხადდა. სახლში ჩატარებული ჩხრეკის შემდეგ, სადაც ამოიღეს აირწინაღები, ტანსაცმელი და სპრეის ბოთლები, ცეცხლაძეს წაუყენეს ბრალი – სისხლის სამართლის კოდექსის 225-ე მუხლი, რომელიც ჯგუფური ძალადობის ორგანიზებას, ხელმძღვანელობას და მონაწილეობას გულისხმობს და 6-დან 9 წლამდე პატიმრობას ითვალისწინებს.
მიუხედავად მძიმე ბრალდებისა არ არსებობს ვიდეო ან სხვა ობიექტური მტკიცებულება, რომელიც ადასტურებს ძალადობის ორგანიზებას ან ხელმძღვანელობას.
პროკურატურა ამტკიცებს, რომ ცეცხლაძე მხოლოდ პროტესტის მონაწილე კი არა, არამედ ორგანიზატორიც იყო. ისინი იშველიებენ ვიდეომასალას, სადაც ის საუბრობდა ბარიკადების აგებისა და თავდაცვის სტრატეგიებზე. მათი მთავარი მტკიცებულება არის ვიდეო, რომელიც თავად "დაფიონმა" გაავრცელა, სადაც ცეცხლაძე თავდაცვით სტრატეგიებზე საუბრობს. ეს ინტერპრეტირებულია როგორც „ძალადობისკენ მოწოდება“. ხოლო სხვა დამამტკიცებელი მტკიცებულებები ბრალდების მხარემ ვერ წარმოადგინა.
ადვოკატის განცხადებით, მისი ინტერესები თავდაცვას უკავშირდებოდა, არა თავდასხმას. ოჯახის წევრები ასევე ხაზს უსვამენ იმას, რომ ცეცხლაძეს ნოემბრის ბოლოს აჭარაში ბაბუა გარდაეცვალა და დაკავებამდე 27-29 ნოემბერს თბილისში საერთოდ არ იმყოფებოდა, რაც ეჭვქვეშ აყენებს მის მონაწილეობას ორგანიზებულ ძალადობაში.
მიუხედავად ამისა, 6 დეკემბერს, თბილისის საქალაქო სასამართლომ ცეცხლაძეს წინასწარი პატიმრობა შეუფარდა. "ეს არა სამართლებრივი, არამედ პოლიტიკური პროცესია," – აცხადებს მისი მამა, ზურაბ ცეცხლაძე, რომლის თქმითაც, ოჯახს ემუქრებოდნენ და მას სამსახურიდან გაათავისუფლეს პოლიტიკური მოტივებით
სასამართლო პროცესზე მან თქვა რომ მისი დაკავება არის ხელისუფლების პოლიტიკური გადაწყვეტილება და არა სამართლებრივი პროცესი. იგი ციხიდან აგრძელებს წერილების წერას: "მიუხედავად ყველაფრისა, ბრძოლას ყოველთვის აქვს აზრი."
მისი მხარდამჭერები საერთაშორისო ყურადღებას ითხოვენ და აცხადებენ, რომ ეს დაკავება არის საქართველოს ავტორიტარიზმისკენ გადახრის მკაფიო სიგნალი.
