გიორგი ოკმელაშვილი

დაკავებული

ნაწამები

ძალადობა

პატიმარი

გ. ოკმელაშვილი

გიორგი
ოკმელაშვილი

2024 წლის 15 მაისს, თბილისში, პოლიციამ სამსახურისკენ მიმავალ გზაზე დააკავა სარეკლამო კომპანია „ლიმონის“ დამფუძნებელი და ყოფილი მორაგბე, გიორგი ოკმელაშვილი. მისი დაკავება უკავშირდებოდა „აგენტების კანონის“ წინააღმდეგ მიმდინარე აქციებში მონაწილეობას. შინაგან საქმეთა სამინისტრომ (შსს) მალევე გაავრცელა განცხადება და უწყების მიერ დამონტაჟებული ვიდეოჩანაწერი, რომლის მიხედვითაც ოკმელაშვილს ბრალი ედებოდა პოლიციელზე თავდასხმაში, რაც 4-დან 7 წლამდე პატიმრობას ითვალისწინებს. “აქციის მიმდინარეობისას, დაკავებულმა იდაყვისა და მუშტის დარტყმით პოლიციის თანამშრომლებს სახის არეში დაზიანებები მიაყენა“.

დაკავების შემდეგ, პოლიციამ ჩხრეკა ჩაატარა ოკმელაშვილის საცხოვრებელ სახლსა და სამუშაო ადგილზე. შსს-ს ინფორმაციით, 13 მაისს, პარლამენტის წინ გამართულ აქციაზე, ოკმელაშვილმა ფიზიკური შეურაცხყოფა მიაყენა პოლიციის თანამშრომლებს. ადვოკატის თქმით, ჩხრეკისას სახლიდან ტექნიკასთან ერთად ტანსაცმელიც წაიღეს. შსს-ს ცნობით, ოკმელაშვილი წარსულში ნასამართლევი იყო ძალადობისა და პოლიციის მოთხოვნისადმი დაუმორჩილებლობისთვის. ოკმელაშვილის მეუღლის ძმა იხსენებს ერთადერთ კონფლიქტს, რომელიც ოკმელაშვილს დაახლოებით წელიწად-ნახევრის წინ რუსეთის მოქალაქეებთან მოუვიდა.

«თავიდან მეგონა, რომ იყო რაღაც გაურკვევლობა და გარკვევის შემდეგ გამიშვებდნენ. ყოველი დღე იყო უცნაური, სულ ველოდი, რომ გამიშვებდნენ, მაგრამ რაც ეს ამბები დაიწყო, ვრწმუნდები, რომ აქედან ჩვენი გამშვებები ესენი არ არიან. სამაგალითო დასჯაა მიზანი და სამაგალითოდაც დაგვსჯიან, მთავარია სხვებს არ შეეშინდეთ და ფარხმალი არ დაყარონ.»
—გიორგი ოკმელაშვილი

აღსანიშნავია, რომ კომპანია „ლიმონი“, არ ქმნიდა ვიდეოებს „აგენტების კანონის“ წინააღმდეგ აქციებისთვის და დამფუძნებლის დაკავებამდე არც იდევნებოდა. კონტექსტისთვის მნიშვნელოვანია ისიც, რომ ქართული ოცნების ლიდერის მამუკა მდინარაძის მიერ 11 მაისის მიტინგზე მონაწილეთა რაოდენობის 20 ათასად შეფასების საპასუხოდ, „ლიმონმა“ ფეისბუკზე იუმორისტული პოსტი გამოაქვეყნა, რომელშიც აქციის ვიზუალის მათთან შექმნის შესახებ იხუმრა. კომპანიის თანამშრომლის განმარტებით, ეს ხუმრობა სოციალური ქსელების საერთო ტენდენციას ემთხვეოდა, თუმცა პოსტი მოგვიანებით წაიშალა.

შესაძლებელია ასევე მნიშვნელოვანი იყოს, რომ 2023 წელს, USAID/Georgia-ს ეკონომიკური უსაფრთხოების პროგრამის ფარგლებში, „ლიმონს“ ვირტუალური წარმოების თანამედროვე ტექნიკა გადაეცა. ხოლო აშშ-ის საერთაშორისო განვითარების სააგენტოს საქართველოს ხელისუფლება ხშირად ახსენებდა საქართველოში "რევოლუციის" მსურველი ძალების დამფინანსებლად.

2024 წლის დეკემბერში რადიო თავისუფლებისთვის ციხიდან მიცემულ ინტერვიუში ოკმელაშვილმა 13 მაისის ეპიზოდი გაიხსენა და აღნიშნა, რომ პოლიციის ქმედებები პროვოკაციული იყო, რამაც გამოიწვია შეხლა-შემოხლა. “მგონი დღევანდელი დღიდან სასაცილოდ ჩანს ის აგრესია, რაც იმ დღეს ხდებოდა, თუმცა არც იმ დღეს დაგვაკლეს შავნიღბიანებმა დემონსტრანტებს. პერიოდულად ტოვებდნენ პოლიციელების გაკეთებულ ხაზს ნიღბიანები, ზონდერები და გვიწყებდნენ ცემას. როგორც ყოფილ მორაგბეს, ჯაჯგურში და გაწევ-გამოწევაში მაქვს საკმარისი გამოცდილება, რომ არ დავიბნე და მეტ-ნაკლებად ადეკვატურად ვიმოქმედო. ამ ცემა-ტყეპის დროს არ ვანებებდი ნიღბიანებს შედარებით სუსტების „თავისთან“ წათრევას, რომ შემდეგ იქ გაათმაგებული ძალებით ეცემათ. სწორედ ამ ჯაჯგურში, ხელის კვრაში და გაწევ-გამოწევაში მოხდა ის ეპიზოდი, რომელსაც მედავებიან.”

16 მაისს ოკმელაშვილს ბრალი დაუმძიმდა და მცირე რაოდენობით ნარკოტიკული ნივთიერების შენახვაც დაემატა, თუმცა შემდგომ ეს ბრალდება მოიხსნა. ოკმელაშვილის სასამართლო პროცესი 16 ივლისს დაიწყო.

სასამართლო პროცესი ხასიათდებოდა გაჭიანურებებით. 12 დეკემბერს მოსამართლე გიორგი გელაშვილმა ოკმელაშვილს პატიმრობა 2 თვით გაუხანგრძლივა. ადვოკატის განცხადებით, ამ დემონსტრაციებზე დაპატიმრებული სხვა ბრალდებულების პროცესების მსგავსაც, ამ შემთხვევაშიც პროცესი განზრახ ჭიანურდებოდა, რათა პრეზიდენტ სალომე ზურაბიშვილს შეწყალების შესაძლებლობა არ ჰქონოდა.

ადვოკატმა სასამართლოს შემადგენლობის აცილება მოითხოვა - სხდომის მრავალჯერ გადადების და ზემოაღნიშნული გადაწყვეტილების მიზეზით, თუმცა ცხადია მოსამართლემ დაუსაბუთებლად მიიჩნია არგუმენტი და აცილების მოთხოვნა არ დააკმაყოფილა, პროცესის მომდევნო დღეს ჩატარების შეთავაზებაზე კი უპასუხა: “ხვალ ვერ ჩავატარებ, პროცესები მაქვს”.

«თქვენ აქამდე არასაპატიმრო საქმეები განიხილეთ მაშინ, როცა პატიმრის სისხლის სამართლის საქმის განხილვა პრიორიტეტულია. ეს მაძლევს იმის თქმის საფუძველს, რომ განზრახ აჭიანურებთ პროცესებს”»
—უპასუხა კობა ბარამიამ.

15 იანვარს ნარკოტიკული ნივთიერების შენახვის ბრალდება მოიხსნა, ამ მუხლით ჩადენილ დანაშაულს პარლამენტის მიღებული ამნისტიის კანონი შეეხო.

24 იანვარს მხარეებს საპროცესო შეთანხმების შესაძლებლობა მიეცათ. ბარამიამ განმარტა რომ, მოსამართლემ თავისი ინიციატივით გადადო სხდომა - იმ მოლოდინით, რომ ბრალდების მხარეს, შესაძლოა, შეთავაზება ჰქონდეს დაცვის მხარის მიმართ.

«დაცვის მხარის პოზიცია არის ცალსახა, რომ გიორგი ოკმელაშვილი უდანაშაულოა, ის მოქმედებდა აუცილებელი მოგერიების ფარგლებში. ეს სასამართლომაც ძალიან კარგად იცის, ამიტომ გამოთქვამს ვარაუდს და იმედს, რომ, შესაძლოა, ჩვენ მიმართ გაფორმდეს საპროცესო შეთანხმება. ეს ბრალდების მხარის ინიციატივა უნდა იყოს. ჩვენ არანაირი ინიციატივა არ გვჭირდება, რადგან დაცვის მხარის პოზიცია იყო ცალსახა, ეს მტკიცებულებებით არის გამყარებული. სასამართლოს ამ ვითარებაში უჭირს გამამტყუნებელი განაჩენის დადგენა, რადგან საქმეში დევს მთავარი მოწმის ცრუ ინფორმაცია და ამ ცრუ ინფორმაციაზე არის აგებული ბრალდება. ბუნებრივია, ის დგას მორალური დილემის წინაშე, სამართლებრივს რომ თავი დავანებოთ. ამიტომ მან გამოთქვა ინიციატივა, რომ სხდომა კიდევ ერთხელ გადადებულიყო და ბრალდების მხარეს მოუწოდა, დაცვის მხარესაც, რომ იქნებ ჩვენს შორის შედგეს მოლაპარაკება"»
— თქვა ადვოკატმა.

თუმცა, როგორც ჩანს სასამართლომ მოახერხა ზემოაღნუშნული დილემის და მტკიცებულებების დაიგნორება და 4 თებერვალს ოკმელაშვილს 5-წლიანი პატიმრობა მიუსაჯა. განაჩენის გამოცხადების შემდეგ ოკმელაშვილმა ცირკი „შაპიტოს“ სიმღერა წაიმღერა. ადვოკატი გადაწყვეტილების გასაჩივრებას და ევროსასამართლოში მიმართვას გეგმავს.

17 მარტს ოკმელაშვილის მეუღლემ განაცხადა, რომ მისი მეუღლე ქსანში, დახურული ტიპის დაწესებულებაში გადაიყვანეს რაც განაჩენს ეწინააღმდეგება, რომელიც ნახევრად ღია ტიპის თავისუფლების აღკვეთის დაწესებულებაში ყოფნას ითვალისწინებს და ამის შესახებ არც ოჯახს და არც ადვოკატს არ შეატყობინეს.

მისი თქმით, ოჯახმა "სრულიად შემთხვევით" გაიგო, რომ ოკმელაშვილი სხვა საპატიმროში იყო გადაყვანილი, რადგან არ შედგა დაგეგმილი ვიდეოზარი, რისი მიზეზიც იყო ის, რომ ოკმელაშვილი გლდანის დაწესებულებაში აღარ იმყოფებოდა. თამთა ჩხეიძე აღნიშნავს, რომ საკმაოდ დიდი დრო დასჭირდათ იმის გასარკვევად, თუ სად იყო მისი მეუღლე გადაყვანილი.

"აგენტების კანონის" წინააღმდეგ მიმდინარე აქციებისას, სამართალდამცავების მხრიდან სამსახურებრივი უფლებამოსილების გადამეტების/ძალადობის შესაძლო ფაქტებზე არ დამდგარა კონკრეტული პირების პასუხისმგებლობის საკითხი; მიუხედავად იმისა, რომ პოლიციელებისა და სპეცდანიშნულების რაზმის თანამშრომლების მხრიდან უხეშ მოპყრობას და დემონსტრანტების გამეტებით ცემასაც არაერთი ვიდეო ასახავს. გაზაფხულის აქციების, სხვადასხვა დროს, დააკავეს ათობით პირი. მათ ნაწილს პოლიციელების წინააღმდეგ ძალადობა და ქონების დაზიანება ედება ბრალად.

※Loading...