ქათამაძე, იგივე გაფფარ ილმაზი, თურქეთის ეთნიკურ ქართველთა საზოგადოების ლიდერი და აქტივისტია, რომელიც 2012 წლიდან საქართველოში ცხოვრობს. ის ცნობილია როგორც "ბათუმელი მედროშე", რადგან აქტიურად მონაწილეობდა ბათუმის საპროტესტო აქციებში და ხელში ყოველთვის საქართველოს დროშა ეჭირა. 57 წლის ქათამაძე წლებია იბრძვის საქართველოს მოქალაქეობისთვის, თუმცა უარი არაერთხელ მიიღო.

2025 წლის იანვარში თემურ ქათამაძე ორჯერ დააკავეს. პირველად, 11 იანვარს, ბათუმის პოლიციის სამმართველოსთან აქციაზე, ადმინისტრაციული წესით, პოლიციელის კანონიერი მოთხოვნისადმი დაუმორჩილებლობის ბრალდებით. დაკავებისას, მისი განცხადებით, მასზე ფიზიკურად იძალადეს და სიტყვიერი შეურაცხყოფა მიაყენეს, მათ შორის ბათუმის პოლიციის უფროსმა, ირაკლი დგებუაძემ. ამ ფაქტზე გამოძიება მიმდინარეობს. მეორედ, 16 იანვარს, გათავისუფლებისთანავე, ის კვლავ დააკავეს და გადაიყვანეს სამტრედიის დროებითი მოთავების იზოლატორში, შემდეგ კი მიგრაციის დეპარტამენტის დროებითი განთავსების ცენტრში, სადაც იგი ამ დრომდე იმყოფება. დაკავების მოტივად ხელისუფლებამ საქართველოს საიმიგრაციო კანონმდებლობა დაასახელა და განაცხადა, რომ ქათამაძეს საქართველოში ცხოვრების უფლება არ აქვს და ქვეყნიდან უნდა გააძევონ.

დეპორტაციის საფრთხის გამო ქათამაძემ ლტოლვილის სტატუსის მინიჭება მოითხოვა, თუმცა სამინისტრომ მისი განაცხადი დასაბუთების გარეშე, კანონით განსაზღვრულ ვადაზე ადრე არ დააკმაყოფილა. სასამართლომ ასევე არ დააკმაყოფილა მისი მოთხოვნა ლტოლვილის სტატუსის მინიჭების შესახებ.

თემურ ქათამაძე დაკავების დღიდან შიმშილობდა და მისი თქმით, დაკავების დღიდან იგი მუდმივი ფსიქოლოგიური ზეწოლის ქვეშაა. 48-დღიანი შიმშილობის შემდეგ, 5 მარტს, მისი ჯანმრთელობის მდგომარეობა გაუარესდა და ის საპატიმროდან სამედიცინო დაწესებულებაში გადაიყვანეს, სადაც მან შიმშილობა შეწყვიტა.

თემურ ქათამაძის საქმეში არაერთი კანონდარღვევაა:

• ლტოლვილის სტატუსის მინიჭებაზე უარი კანონით განსაზღვრულ ვადაზე ადრე მიიღო.
• სასამართლოებმა არ გაითვალისწინეს ის ფაქტი, რომ თემურ ქათამაძე წლებია საქართველოში ცხოვრობს, აქვს მუდმივი საცხოვრებელი ადგილი და აქტიურად საქმიანობს.
• თემურ ქათამაძის დაკავება და დეპორტაციის პროცედურების დაწყება, სავარაუდოდ, მის აქტიურ საზოგადოებრივ საქმიანობასა და საჯარო პროტესტს უკავშირდება.
• თემურ ქათამაძის განცხადებით მასზე განხორციელდა ფიზიკური და ფსიქოლოგიური ძალადობა. ამჟამად, თემურ ქათამაძის საქმე სააპელაციო სასამართლოშია გასაჩივრებული.