ნიკა კაცია, ქართველი ჟურნალისტი, 2024 წლის 7 დეკემბერს დააკავეს, როდესაც სახლიდან პროევროპულ აქციაზე მიდიოდა. პროფესიით ჟურნალისტი თანამშრომლობდა კოალიციასთან „ცვლილებისთვის“ და ჩართული იყო მათი საარჩევნო კამპანიების დაგეგმვაში.

მეგობრებმა მედიას შეატყობინეს, რომ გასვლამდე კაციამ ბინის კარები, სადაც დედა იმყიფებოდა გარედან ჩაკეტა. რამდენიმე საათის შემდეგ პოლიცია ბინაში მივიდა და სახლში შესვლა მოთხოვა, ასევე აცნობეს, რომ მისი შვილი კრიმინალურმა პოლიციამ დააკავა. გამომდინარე იქიდან რომ პოლიციას სახლის გატეხილი გასაღები ჰქონდა, დედას გაუჩნდა ეჭვი რომ მისი შვილი ნაცემია და გასაღებიც ასე გატყდა.

კაციას ადვოკარის, ნინო ლომინაძის განცხადებით სამართალდამცავი ორგანოების თანამშრომლები კაციას სახლთან ელოდებოდნენ, ძალით ჩასვეს მანქანაში და სხვა ადგილას წაიყვანეს, სადაც ქუჩაში გაჩხრიკეს. როგორც კაციამ ადვოკატს უთხრა, პოლიციამ ჩხრეკა გადაიღო, თუმცა არაფერი ამოუღიათ.

კაციას ბრალი სისხლის სამართლის კოდექსის 260-ე მუხლის მე-6 ნაწილით წაუყენეს, რაც დიდი ოდენობით ნარკოტიკული საშუალებების უკანონო შეძენა-შენახვას გულისხმობს. პროკურატურა ნუგზარ ჭიტაძის ხელმძღვანელობით, წინასწარ პატიმრობას ითხოვდა, სავარაუდო დანაშაულის სიმძიმისა (8-დან 20 წლამდე ან სამუდამო პატიმრობა) და გაქცევის ან განმეორებითი დანაშაულის რისკის გამო.

სასამართლოში მოსამართლე ნინო თარაშვილმა პროკურატურის მოთხოვნა დააკმაყოფილა და უარი თქვა დაცვის მხარის შუამდგომლობაზე გირაოს და პროკურორის აცილების შესახებ. კაციას ადვოკატმა განაცხადა, რომ პროკურატურის ბრალდებები დაუსაბუთებელი იყო და ხაზი გაუსვა, რომ მის დაცვის ქვეშ მყოფს წარსულში ნასამართლეობა არ ჰქონია. მან ასევე მიუთითა ინტერესთა პოტენციურ კონფლიქტზე, რადგან პროკურორ ჭიტაძის დეპარტამენტი ზედამხედველობს პოლიციის სავარაუდო გადაცდომების გამოძიებას, მათ შორის კაციას საქმეში მტკიცებულებების შესაძლო გაყალბებას.

დაცვის მხარემ 5,000 ლარიანი გირაო მოითხოვა, რაც მოსამართლემ არ დააკმაყოფილა. ადვოკატ ნინო ლომინაძის თქმით, ისინი კანონით დადგენილ ვადაში სააპელაციო სასამართლოში გაასაჩივრებენ საქალაქო სასამართლოს გადაწყვეტილებას.

არასამთავრობო ორგანიზაციებმა, რომლებმაც კაციას და საპროტესტო აქციებზე დაკავებული სხვა აქტივისტების საქმეები შეისწავლეს, სერიოზული ეჭვები გამოთქვეს მათი დაკავების კანონიერებასთან დაკავშირებით. მათ მიუთითეს შემდეგზე:

• „კონფიდენციალური წყაროების“ გამოყენება მათი სანდოობის გადამოწმების გარეშე.
• „გადაუდებელი აუცილებლობის“ ფართო გამოყენება წინასწარი სასამართლო ორდერის გარეშე ჩხრეკის გასამართლებლად.
• ჩხრეკის დროს დამოუკიდებელი მოწმეების ან ვიდეოჩანაწერების არარსებობა.
• პოლიციის ქმედებების ფორმალური სასამართლო განხილვები.
• ნარკოტიკების მოხმარების ტესტების არარსებობა.
• დაცვის მხარის შუამდგომლობების დაუსაბუთებელი უარყოფა.
• წინასწარი პატიმრობის აუცილებლობის არასაკმარისი დასაბუთება.

გარდა ამისა, შეშფოთება გაჩნდა კაციას პატიმრობის დროს მისი მოპყრობის შესახებ. გავრცელდა ინფორმაცია საკვების, კომუნიკაციისა და ვარჯიშის შეზღუდვებზე და ანტისანიტარიულ პირობზე. გავრცელდა ბრალდებები, რომ კაცია მოათავსეს მოსაცდელ ოთახში პროევროპული აქციების მიმართ მტრულად განწყობილ პირებთან, რაც მის უსაფრთხოებაზე მოქმედებდა. სასჯელაღსრულების სამსახურმა ეს ბრალდებები უარყო, თუმცა, სახალხო დამცველის ოფისმა დაადასტურა, რომ მათ კაციასგან მიიღეს საჩივრები პენიტენციურ სისტემაში მისი უფლებების დარღვევის შესახებ.